> Zurück

Sechster Sieg in Serie

Herren 2, Gilles Bertholet 04.12.2018

VBC Langenthal - VBC Münchenbuchsee 1:3 (25:17, 18:25, 26:28, 14:25)

Amenä Samsti Namitag im überraschend sunnige Langethau hei säch 9 meh oder minder jungi Buebe igfunge für
sech mit 7 chle weniger Junge Buebe us Langethau im Ball über die Schnur ds messe.

Üsem Coach si zwe zuäsätzlechi Bei gwachse und ds Gschlecht schiint ou nüm ds gliche gsi ds si. Item, jetzt mau zum Spiel.

Im erste Satz het mä chönne meine das mr lieber dusse ir Sunne wäre aus ir chaute Turnhaue, nach dr Heufti vom Satz het säch d Situation nid wük besseret gha, d Bankspiler hei sech langsam gfragt wie das mä ds dritt ds ganze Team cha ersetze. Nach churzem ufbäume gäge ändi Satz chöimer das Thema abschliesse. 20 Minute gspiut, 25:17 für Langethau.

Nachere Mitti Rotation, ä stupf i ds füdle vom Coachingstaff und intensives ufwerme vor Bank simmer i 2 Satz gstartet.
Dies mau aber Standesgemäss, dies mau simer parat gsi dr Kampf a ds nä. Aber leider heimer geng no chle meh unsicherheite gha aus souveränität. Nachemnä überraschende Wächsu, aber akündigt und vorbereitet, het dr Coachingstaff ä Lebenssprütze ids Team gä. Die neu gfungeni Motivation het zum nä Muntere hin und här gfüehrt mit je lengers je meh Vorteile für d Buchsi Herre.
witeri 20 Minute gspiut und dies mau steits 18:25, we are slowly getting back on track.

Nach däm Närveufribende Start heimer üsnä wie geng treue Fans chle meh wöue biete, d Mittinä hei je lengers je meh afa Chlepfe und am Block heimer langsam ou ds 8i vo Langethau i griff bercho oder besser är hets nüm so gseh. Nachemnä grosszügige Entscheid vom Schiedsrichter heimer d chance bim Schopf packt und ou dä Satz rassig, souverän und knapp hei ta. 24 emotionali Minute und 26:28 für die jüngere Buebe. Gfiiret
heimer aus hätte mr dr Match gwunne :)

Leider hets am afang vom vierte Satz füre Team Senior und für Star Nachwuchspasseur nid viu ds lache gä. Am einte zwickts im Wadle und dr anger jetzt no d Position wächsle. Wär jetzt am Senior d Verletztig zue gschribe het, schande über euch ;)
Trotzem wächsu ufem Pass und Dia, heimer dr moralisch Vorteil gnutzt und dr Dume druf gha. Vo Langethau isch nüm viu cho und mir hei üses Powervolley mit viu Spass dürezoge. Dank dä starche Blocks, agriffe und Defensive isätz heimer schnäu viu vorsprung useghout, nachem letzte Wächsu vom Spiu heimer nach wenige versüech ou dr 4. Satz heita, 14:25 und 19 Minute heimer brucht zum dr erst Satz ändgütig vergässe ds mache.

Somit blibt nur no ds erwähne das mr ou ohni üse Coach chöi gwinne, witerhin ungschlage si und ou dr letzt direkt Konkurrent ir Vorrunde zruggbunde isch worde.

Wär gärn gseht wie jungi Buebe mit eutere Buebe spile isch fründlech ufgforderet sech am Samsti 08.12.2018 uf die 6i ir Bodeacker Halle i ds finde.
Dr VBC Stude und mir freue nis uf vili Zueschouer.

Für ds Herre 2 hei gspiut:
Thomas "C" Reusser, Adrian Reusser, Philippe "Wade" Bobillier, Benjamin "Junior" Zuberbühler, Tobias "The Power" Häubi, Nic "Ptheven" Sobhani, Felix "Joker" Schulte-Bahrenberg, Merlin Janis Jacob "Reiseführer" Tanner, Tim "Yellow" Dobler, Gilles "Team Senior" Bertholet.
Coachingstaff: Nora Wiezinski, Leandra Müller, Stefan Enzler.
Zueschouerzahl: 6(Nur Buchsi)