> Zurück

Ou mit Dörrfrücht chame gwinne

Damen 2 - Raval Fabienne 08.03.2018

Volley Oberdiessbach b - VBC Münchenbuchsee 0:3

 

Schön ischs gsi der Match isch düre,

z 3:0 isch im Sack mer luege füre.

Dr Match isch uswärts gsi und nid deheim,

wases derzue z säge git gits imne chline Reim 

 

Uf Oberdiessbach simer gfahre a däm Mittwuch Abe,

Punkt sibni heimer müesse zum Apäu atrabe.

D Trube wär wie immer fasch z spät cho wüu si sech het verfahre i dere Metropole,

wosi de ääändlech isch zuechegfahre mitem voue Outo hets nes de afa wohle.  

Wie immer heimer wöue drü Punkt ergattere miteme solide Spiu,

mer heines ja Huufe vorgno und hei ou no z einte oder angere Ziu.  

Aber viu z säge zu däm Match vo üsere Site gits irgendwie nid so würklech weni so drüber noche dänke,

mer hei ghüschteret ufem Fäud aus hät me no nie zäme gschpiut und hei am Gägner eidütig viu z viu Punkt wöue schänke.  

 

Di erschte zwe Sätz si in etwa glich von Statten gange und es isch es komisches- und so gar nid üses Spiu gsi, das het me gloub gmerkt,

es isch es langsams gsi mit viu z viu Fähler uf üsere Site womer süsch nie mache und do heines ou Dörrfrücht und Nüssli us der Box nid gsterkt.

Di Sätz si z Änd zu 22 und 20, immerhin zu üsne Gunschte heimer se chönne entscheide mit Ach und Krach,

mer si aber so gar nid z fride gsi u so heimer dänkt: der dritt Satz git e subereri Sach.  

 

Auso ab ufs Fäud und klareri Punkt mache isch Devise gsi für dä letscht entscheidend Satz,

mer hei ganz klar müesse besser wärde süsch gömer nid aus Sieger vo däm Platz.

Het du de me oder weniger klappet und mer si dervo zoge mit guete Service und mit soliderem blocke,

aber ganz ehrlech, hammermässig isch di Leischtig nid gsi das hout niemmer us de Socke.

Der letscht Punkt wones der Sieg het bescherrt heimer sogar no fasch verpasst und bau chli überrascht simer de gsi,

u ersch wo der Räscht vor Manschaft isch ufs Fäud glüffe heimer gmerkt, ach sooo, das Spiu isch verbi. 13:25

 

Ke Glanzleischtig das gäbe mer zue aber glich heimer gwunne und nes dä Sieg nid lo näh,

es isch ja nid so dasmes nid versuecht hätti und nes ke Müe hätti gä.

  

Der letscht Buchsisamschtig dörfter nid verpasse, chömit cho afüüre sit wider derbii,

no ei Match heimer bevor mer ad Ufschtigsspiu gö, när wärs das für di Saison de gsii.

13:30 isch Apfiff gäge Spiez u ou dä Match wei mer gärn no gwinne,

mer si gewillt es super letschts Spui z zeige mit Power ufem Fäud und lutstarchem, afüürendem singe.

 

HA-XII