> Zurück

Wärerliwär isch Cupsieger

Damen 2 - Raval Fabienne 09.04.2018

VBC Münchenbuchsee - Volero Aarberg 3:0

 

HAAAAAAAAAAAAAAAAAAAAAAAAAA-XIIIIIIIIIIII

Sone lute Schreii hetme öppe no fasch nie ghört, ig zmingscht ha näre bau chli der Chischteri gha ;)

 

Iz heimer de öppe würklech aus erreicht wome i eire Saison cha erreiche: Ligameischter, z xx?-wieviute Spiu infoug womer gwunne hei (gloub si mitterwile über 40gi?), Ufstieg id 1Liga und iz ou no der Cupsieg, jeiiiiiiiiiiiiiiiiiiiiiiiiiiiiiii

 

Dä Samschtig isch ganz im Zeiche vo: "Buchsii rockt" gstange! Zersch hei d Juniore ihres Spiu gwunne, 5h später hei mir de ou no dörfe aträtte und Aarbärg miteme 3:0 wider heigschickt! So isch de dä Bärnercupfinau eidütig zum Buchsiifescht umbenennt worde :)

 

Trotz superschönem Wätter hei soooo viu Fäns der Wäg id Wissesteihaue gfunge, dases es richtigs Fän-Battle het gä zwüschen Buchsiiegge und de Fäns vo Aarbärg. MERCI viu viu mau für öii Ungerstützig z ganze Jahr düre, dir sit eifach super!! So macht e Match natürlech dopplet spass und mer hei de zauriich agreiste Lüt ou chli öppis wöue biete! 

 

Ide erschte beide Sätz ischnes de das ou glunge und mer heines relativ gleitig miteme guete Punktevorschprung chönne absetze! Gueti Service -> check, präzisi Anahme -> check, Pass und bäääääm,.. Sicher heimer nid 100% vo üsem "Können" uspackt, d Saison isch aber ou rächt läng- und üsi Beii si sicher ou scho langsam chli müed gsi. Nichts desto trotz heimer es guets Spiu gspiut, heis luschtig gha ufem Fäud, hei e gueti Teamleischtig zeigt und so het de z Täfeli ide erschte zwe Sätz relativ klari Resultat zeigt, 25:18, 25:14

 

Wie heissts so schön bi jedem vo üsne dritte Sätz? Genau, es isch 0:0 auso looos, heitue das Ding mer weii go fiire. Göt mau d Matchbrichte vode letschte paar Matche go läse, chönnt in etwa z gliche schribe wi dert :P 

Ja, het villech im dritte Satz nüm ganz so guet häreghoue wi das hät söue und Aarbärg het feii viu gueti Punkt chönne mache. Mir hei afo schludere, hei d Agriffe nüm härebrocht wie gewünscht, z viu Eigefähler, d Anahme si überau angers häre cho aus zum Nathi und so ischs de ou nid verwunderlech gsi dasmer dä cheibe Satz no fasch hätti abgä! Isch doch am Schluss bau knapp gsi und es 25:23 drus worde! Aber mir wäre nid mir wenn mer das Ding nid würde schouckle XD

 

Eh seis drum, gwunne isch gwunne do fragt am Schluss niemmer me dernah was wäre wenn.. Gfüuti 2Mio Fotos später, geplapper mit de Fäns, Siegerehrig und Schämpis unger der Duschi heimer du de d Sunne duss ou no chli chönne gniesse und üse Hunger bi Bier und Hamburger stiue! Wos de langsam chaut isch worde heimer d Party id Krefin-WG verleit womer mit der Hus-eigete Näbumaschine e Partyruum us der Stube gmacht hei, der Abschluss vo däm super Tag heimer de im Bierhübeli gha! Mit huufe angerne Volleybauer, de Junioresieger usem eigete Verein und nach dere Hammer-Saison verdiente Siegesdrinks heimer de bis spät id Nacht/oder früe am Morge tänzlet unds luschtig gha :)

 

Last but not least chunnt der letscht Saisonabschluss (mi düecht mer heigi iz de öppe 10 gha :P) de dä Samschtig womer üses aueriletschte vode letschte Spiu chöii spile vo dere Saison und ir 2Liga. 

Sit derbi wenn mer gäge z Team vo Le Locle üses zwöite Ufstiegsspiu spile, Apfiff isch am füfi (17:00) ir Haue z Buchsii!

 

HA-Xi